أخر تحديث : الجمعة 29 أبريل 2016 - 9:53 مساءً

آشنو كاتسْتافد البشرية من البشرية ؟؟

بوابة القصر الكبير | بتاريخ 29 أبريل, 2016 | قراءة

betat

اليوم و كما العادة جالس فالقهيوة، كانشرب قهوتي بوحدي كما العادة، جالس كانتصفح الفايسبوك، فإذا بيه كااامل صور ديال ‫#‏أنقدوا_حلب‬ ، و كلشي كايبكي ( غير بالايموتيكونز طبعا )… و هو يجيني فبالي الفكرة ديال واحد الأمريكي اللي طلعلو هاد الزمر فراسوا و لقى لينا الحل لهادشي.

فعام 1991، واحد الأمريكي اسموا less U. Knight كان جالس مع راسوا و بدا يفكر.. الحروب .. الفقر .. الإحتباس الحراري .. انقراض الفيل الافريقي .. و المشاكيل فكل بلاصة، و هو يقول !! هادشي كامل بسبب البشر ! البشر سباب الحرب و سباب تدهور حال الكوكب و هو يقول الحل هو نتهناو من البشر .. خاص البشر ينقارض .. و تتحل المشاكيل ..

اذا كان عندك الوقت قلب ف google على “الحركة الطوعية لانقراض الجنس البشري” أو VHEMT و هاد الحركة كان أسسها صاحبنا الأمريكي، و باقا لحد الأن كاتنشط .. و كاتنشر فكر أننا نوقفوا عملية الانجاب .. و ننسحبوا بكل بساطة حيت فشلنا أننا نعيشوا ..

و مع هاد الصور اللي شفت اليوم و الصور االي شفت البارح فبورما .. و قبل منها ليبيا و اليمن .. و شحاااال هادي الصور ديال العبيد اللي كانو كايتم التهجير ديالهوم لأمريكا .. و الصور اللي مرسوما على ابادة السكان الاصليين ديال القارة الامريكية .. و المعارك اللي مصورة على مر التأريخ ديال قطع الرؤوس .. و الوصف اللي كاين فكتب التاريخ على الحروب ديال ما قبل التاريخ .. على هادشي كاااااااامل كايبانلي أن الفكرة ديال الانقراض و الاستسلام لفشلنا فأننا قدرنا نعيشو غاظي تكون أرحم بكثير للاجيال القادمة أنهم مايتولدوش أصلا ..

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع