أخر تحديث : الأحد 2 أبريل 2017 - 7:12 مساءً

سيدتي هذه الكوزينة البوزبالية، تمثلنا. تمثلنا

بوابة القصر الكبير | بتاريخ 2 أبريل, 2017 | قراءة

خالد الشرادي
هاد الكوزينات الجداد ديال المرأة المغربية الحديثة! فالحقيقة والصراحة والثقافة كاع ممآمن بيهم ،ولا داخلين لي فخاطري أبدا… كوزينة مفتوحة على الدار وفيها الرخام فالوسط، ودوك القريعات ديال التوابل والزيوت بحال يلا مساري فجزيرة صقلية ،و نونوس فالحيط ولوحة ديال رينوار وشي مقتنيات ديال البزار تاهوما مساكن مع ملصقات انيقة على الثلاجة الناصحة البياض تقول غا مخبعين فيها الاميرة ديانا لداخل !! بلاطوات متشابهين ومتناغمين مع السربيس دياى المواس والطحانة ديال العصير لامعة و نقية تقول غير كيطحنو فيها الكريستال ، الكاسرولات برونزيين مكلاسيين من الكبيرة للصغيرة وتا وحدة فيهم مكتستعمل غير مسطرين بحال السلم الموسيقي .. السرابت فبلايصهم ،والمجورة ديال اللوح فيهم الملاعق والفراشط والمواس والعطرية فالقراعي ممسوحين بحال الصيدلية .. المهم كوزينة نقية أنيقة بحال شي صالون شعري فستوكهولم … هذه الموزينة يا اخوتي لا تمثلنا ولا تمثل ثقافتنا وهويتنا وطنيتنا نهائيا ونحن من هذا الممبار ونيابة عن حقيقتنا البوزبالية نرفضها رفضا كاملا … كوزنتنا المغربية هي كوزينة أمي وكوزينة الامهات … طبعا لا وجود للقطع الفنية اساسا الكوكوت كتفسفس فالخمسة ديال العشية القزبور لاصق فالزليج دبال اللورنيا ، الحليب فايض وكارم فالقنت ديال البوطة.. الثلاجة فيها دوك فريصات و البنانات ديال الهند لاصقين على الباب بحال بوبريص والسفلي ديالها واكلو الصدا ، وداك ليطاجير الشهير ديال البلاستيك الملون ، فيه كلشي بداية من المقدة ديال العيد، وصولا الى السم ديال سراق الزيت مخلط مع الفتيلة ديال العيد لي فات .. الفوطات والمنادل وحدة مكتشبه لختها ، ومرة مرة كتلقاهم كيمسحو القشوع بالطرف ديال شي بيجامة قديمة دختك ،ولا تيشورتة ديال ميكي ماوس تمسحو ليه الودنين ف خمسة ،وتسعين …الكيسان مضببن تماما ، الطناجر لي مستفين لفوق معلمين بالحموم ديال الهراكم مع الغبرة ديال رمضان لي فات . الطباصل ديال الطوس المردومين مرشومين بالبانتورا و محطوطين تحت الماريو وسط المقلة الكبيرة ديال الحوت لي طاير ليها اليد، والفران ديال عفيفي يلا حطيتي عليه يدك تقدر تلصق فيه انت والواليدة بقوة السكر ديال الكيكات العيانين المنتشر في المكان، الكوكوت طايرليها اليد ديال الشمال، والطيفالات مقشرين من الوسط ووخا هماك مكيلصقووش البصلة، سراق الزيت ميتسارا فيها تحت البوطة بحالو بحال ولد اختك عاااادي يقدر ماع يتخلطلك مع الكروفيت .. والأحلى ان رائحة البنة تعم المكان .. سيدتي هذه الكوزينة البوزبالية، تمثلنا. تمثلنا.. تمثلنا أما الكوزينة الحداثية المملة فسنجلس فيها ان ساع الله لنقرأ الاعمال الكاملة لنزار قباني …!!

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع