أخر تحديث : الأحد 29 أبريل 2018 - 3:59 مساءً

مقاطعة “المقاطعة” !!

بوابة القصر الكبير | بتاريخ 29 أبريل, 2018 | قراءة

خالد الشرادي
مع هاد الحملة ديال المقاطعات لي خدامة فالبلاد هاد الأيام ، بديت كنوجد لائحة كاملة بالمنتوجات والشركات والأشخاص لي قلبي عامر عليهم، وخاصني نعلن عليهم المقاطعة الكاملة و#نخليهم يريبو تاهوما !!! .. لكن منين بقيت كنتأمل لقيت تقريبا خصني نقاطع البلاد كلها ، بمرافقها و شركاتها و مؤسساتها وبرلمانييها و مدارسها ومستشفياتها وقطاراتها وميكروطروطواراتها .. واعباد الله تا حاجة ماخدامة صحيحة فهاظ البلاد ! حتى الحمام لي حدانا رجع مغشوش وكيسخنوه غا بالروايض قدام بلاصت الجذورا ديال الخشب .. مول الببوشة رجع كيجيب واحد الببوشة بيضة وصغيورة تقريبا فيها غير الكركاسة ..!! مول الصوصيص لي حدانا للأسف مبقاش نهائيا كيدير اللحم ديال” الحمار ” ورجع كيدير غير شي حاجة فيجيطاريان فالصوصيص ، بحال يلا ذابح شي سداري ديال التبن وطاحنو فالماكينة ديال الكفتة .!!! الطب البديل والأعشاب لي كنا كنشريوها غير من عند الصحراوي ف الأرض ..ظهرو مجموعة من العشابة الجدد بكرافاطات وإميلات ووتسابات .. وولاو كيتخلصو بالتحويلات المالية و الدوا ديالهم مبقاش كيداوي” البرد” نهائيا من غير السفرتح.. !!! .. السبرديلات ديال الجوطية حتا هوما رجعو مدرحين بعدما كنا كنورثوهم من المستهلك الأوربي مباشرة، رجع المواطن المسحوق غالبا كيشري نفس السبرديلة لي لاحها خوه الكبير بعدما مسحها مول البال على أساس أنها جاية من اسبانيا !! وحتا واحد مكيهضر. لكن أهم حاجة فكرت نقاطعها بعد الأحزاب السياسية طبعا ومقابلات البطولة الوطنية وكريديات الأبناك ، وشقق السكن الاقتصادي، وجمعيات المجتمع المدني ،والأميسات” الشعرية “…إلخ إلخ هي نقاطع دوك المواطنين لي مقاطعين معانا الما والحليب والمازوط.. ولكن هوما براسهوم كيستغلونا وكيكريو لينا فالصيفية برّاكة على البحر بخمسلاف درهم للأسبوع حيت ما لقينا فين ندوزو العطلة !!! وزيد معاهم تا دوك الباعة لي كيطلقو اللحية و الأناشيد وكيعصرو “القصب الحلو ” بخمسطاشر درهم للكاس ، حيت لا يعقل قصبة ديال السكر وطريف ديال “الزنزابيل” بخمسطاشر درهم للكاس! واخا يكون كأس العصبة هذا ..!!!
وعموما باش الله يقدرني ونقدر نقاطع هادشي كامل قررت نقاطع المقاطعة تاهي ، بينما نكمل اللائحة ديالي والله الموفق
#عطيوني_المقاطعة ديالي نمشي نكَاليزيها فالمقاطعة الحضرية

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع