أخر تحديث : السبت 4 يوليو 2015 - 9:00 مساءً

بَّاحْمد

جمال البكاي | بتاريخ 4 يوليو, 2015 | قراءة

jamal_bekkai

با حمد الملقب بالعسكري محارب قديم ..من نهار لي خلاولو جوج فرنك فلانتريت وهوا كيكافح من أجل البقاء…با حمد عندو مطعم فالسوق معلق فيه تصويرة ديال الحسن الثاني منين كان عندو 18 عام كلاحت بقوة الشمش ،كيظل طول النهار يعاود للكليان ديالو على الپونيزاريو والقودافي وجمال عبد الناصر… با حمد عندو الماكلة الغالية ساويا 6 دراهم وعمرو كيفكر يزيد فالتسعرة ، سولناه علاش؟؟ جاوبنا وهوا كيضحك : براكا عليكوم غير الزيادة ديال بنكيران ..با حمد كيشد المحال نهار التلات باش يدي القفة لولدو لي فالحبس … ونهار الخميس باش يدي مراتو مسكينة تدير الدياليز ..و فصبح الجمعة كيجي يعاود شنو قالولو الطبيب.. واحد النهار قالنا بلي أنو خاصو يشري الدم باش يزيدو لمراتو وسكاااات… داك اللحظة الكليان كولهوم قالولو حنا نتبرعولك آش غادين نخسرو .. شاف فيهم با حمد وحسيت بالدمعة وقفتلو فعينو .. قالهوم الله يجازيكوم بخير.. حنا راسو ودخل للكونطوار باش يبكي بلا ميشوفو تا حد .. تسنيتو يخرج باش نخلصو تعطل .. خرجت بحالي و أنا كنقرقب 3 دراهم وكنحاول منبكيش.. مسكين با حمد الله يكون فعوانو ..

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع