أخر تحديث : الإثنين 12 أكتوبر 2015 - 1:34 مساءً

الحمام بالمَانْدلِينا

جمال البكاي | بتاريخ 12 أكتوبر, 2015 | قراءة

jamal_bekkai

لبارح واحد صاحبي داز عندي باش نمشيو للحمام نسخنو ظلوعنا .. بالفعل جمعت حوايجي وخليت مضاضري وتيلوفوني فالدار وهزيت 10 دراهم ولبست صندالة ديال الميكا باش إذا تسرق الصاك نخرج بأقل خسائر .. منين وصلنا للحمام صاحبي جبد واحد الميكا فيها كيلو ديال المندالينا .. سولتو علاش جابها قالي ندخلوها معانا نبردو بيها .. قولتلو واش حنا جايين نسخنو ضلوعنا ونتا كتقولي نبردو بيها .. ضحك وقالي و الله يلعن بوها قاعيدا غير ولفت وصافي .. عمرنا السطولا وغسلنا بلاصتنا وبدينا نقشرو فداك المندلينا وناكلو منين ساليناها تْجبَّدنا وبدينا نديرو النميمة فعباد الله .. غير شبعنا نميمة قررنا نوضو ندوشو فإذا بينا كنجبرو البرمة خوات .. هضرنا مع الكسال قالنا أنا غادي نطلق الما خرج ما رجع .. بقينا كنساينو تا برد الحمام عاد جا الما .. باش نعمر جوج سطولا شديت الصف بحال يامات لي كانو المغاربا كياخدو الطحين بالبون .. غير وصلت نوبتي عمرت جوج سطولا ..كبيتهوم عليا بالزربة وخرجت بوسخي ..النتيجة لي ستنتجتها هيا أن هاذ صاحبي خطار ..حيث الناس كتجيب جوج مندلينات باش يبرد غير هوما .. وهاد الموصيبة جاب معاه كيلو برد الحمام كامل .. خرجت من الحمام داير الفوطة على راسي شيما يضربني البرد زعماك .. ولي كيتلاقاني كيقولي بالصحة الحمام .. كنشوف فيه بحال شي واحد ديال بصح وكنقولو الله يعطيك شي تحميمة بحال ديال ليوما .. دابا لي بقا فيا من هاد الشي كولو هوا داك عشرة دراهم لي مشات ظلما وعدوانا .. فكرت نرفع دعوى قضائية ضد صاحبي وداك الكسال ومول المنضالينا من أجل جبر الضرر ..لكن تفكرت مقولة شعند الحافي ما يدي من عند المردوم ودرت مناقص .. وباش نعزي راسي قلت فنفسي ماشي موشكيل الخليفة على الله ..

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع