أخر تحديث : الجمعة 22 يناير 2016 - 9:18 مساءً

العرس .. بوشعيب و حياة

جمال البكاي | بتاريخ 22 يناير, 2016 | قراءة

www.ksarforum.com_photos_writers_jamal_bekkai

هذا بوشعيب معروض للعرس .. سالا الخدمة مع الستة داز للقهوة ريح وشعل كارو .. مع السبعة صونالو صاحبو وقالو فين امسخوط راحنا كنتسناوك راه قربو يحطو الماكلا .. بوشعيب كيقولو والله تا نسيت و كينوض يجري نيشان لدار العرس .. كيدخل يريح مع صحابو .. شويا كيجي العريس لابس جلابة بيضا وحشمان .. فعوض لي يباركولو الدراري كيبقاو يقولولو حصلتي امسخوط اشداك .. ويضحكو ههههه .. مع التسعود كيكون كولش واكل وكيخرجو .. كل واحد يقلب على سباطو ويتفرق المجمع مريضنا معندو باس ..

هادي حياة .. معروضة للعرس د بنت عمة راجل ولد خالتها .. شهر و تمنيام باش دفعت التكشيطة وكل نهار كتمشي تدير القوق للخياط .. من بعد كتدوز عند مول الذهب وتقولو عنداك تنساني راه العرس نهار 30 .. كتدوز عند مول السباط وتقيَّس وتقول لصاحبتها واش هادا يجيني مع التكشيكة الزيتية و الصاك لحمر .. راه خاصني نفرع لنادية بنت العسكرى عينها وتحط الصباط وتخرج .. نهار العرس كتمشي للحمام مع 7 دالصبح .. مع 10 كتمشي عند الكوافورا .. مع 12 كتبدا تجمع الدوزان فالصاك وتكتب سميتها فالكادو .. مع الربعة كتبدا تلبس .. مع 10 دالليل كتشد طاكسي وتمشي لدار العرس كتوصل مع 11 لارب .. كتدخل وتريح حدا زينب بنت الجيران كتبوسها وتقولها هيا جابت فالعرس دختي مانطا أنا جبتلها مانطا مبقات تسالني مبقيت نسالها .. وكيبداو فرياضة الألسنة .. شوفي العريس راسو طويل بحال البوطة الزرقا .. ويلي ويلي شوفي نادية بنت العسكري هاديك التكشيطة كارياها من العرايش من عند نور الدين ولد النفار .. شوفي اختي على عصير الما والزغاريد تقول دايرين سيبون .. مع 6 ونص دالصباح كيتحط العشا كتقول حياة لصاحبتها شوفي علا هجيج 3 ديال الطيور عليهوم 10 فالمجلس حنا فالعرس دختي درنا 3 د الطيور على 9 دالناس .. شوفي اللحم مطايبش .. فالأخير كيتفرق العرس مع 8 دالصبح وكتمشي لدارهوم بالكرطونة دالحلوة .. كتدخل كتعطيها لختها .. كتحلها وكيبدا الفحص التقني .. هادي حلوة د الكوك .. هادي د الكركاع .. هادي د بشكيطو .. هادي بريوة .. ويلي ويلي على هجيج مداروش حلوة السمن ودارو غير 6 ديال الشكال حنا فالعرس دختي درنا 7 ديال الشكال .. المهم داك الكرطونة كتدوز تلتيام د الفحص و النتقيب من طرف الأم الأخت الصغرى والمتوسطة و الكبرى .. فالأخير كيجي شي راس الطارو دخوهوم كياكلها بلا ميعلمهوم وكيتفك الصداع …

( ملحوظة هاد لي هضرت عليهوم ماشي العيالات د المغرب .. ديال فينيقيا .. )
اودي كيفما العادة السلاك مع بوحناك وصافي ..

 ksarforum
أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع