أخر تحديث : الخميس 26 أبريل 2012 - 11:32 صباحًا

معنى..بجوج فصوص..

الزجال المفضل الياموني | بتاريخ 26 أبريل, 2012 | قراءة


شفت شي : شوفات..!!!
الشوفه1
ــــ…الكانه
ف الخيال قاقات
توجع الراس وولد
حروف عل قياس
الحال
اتكى الخاطر ف احضان البال

{jcomments on}
كان الجو سخون
والوقت هبيل
والليل…
تايشم السيلسيون
ــــــــــــــــــــــــــــــ


الشوفه 2

ــــــــــــ
الحال مافيه ماتشوف
معفون
الغبينه ضاهره عل لوجوه
بكل نوع بكل لون

ليام خاريه النار
زايده ف السرعه
اللي كان سبع رجع لبوه
اللي كان بجوج
ولى يمشي بربعه
ــــــــ
الزلط تايطاطي بلا سباط
الهم تايشاطي
الريح نفخ ساط
هازني رماني

للحال

الشوفه3
تعلقت ف خيالي
فين دوك التواسع
فين قبل علي راسي
فين شفتني للحياة راجع
غ أنا وهبالي..

ماشي ف الثلث الخالي
لا صاحبي علي يفهم
لا ولدي يزيدني فالهم

لا خالي
يطمع فيا
لا عم

تماك اعطيت بالراس للكانه
بين طيحة ونوضه
ونعسه و فيقه
تانخرج من تحت محاني
تنسيل من بين سناني
تنتكركب عل ضهر لساني
مغمض رمانه

تنبانلي كلام مرصوص
معنى بجوج فصوص

الشوفه 4
ـــــــــــــــ
تتشعل الدواخل
عوافي
تيسيل الما وصافي
دوا..يشافي
حراق وافي
كيه وقديمه

نخصه معايا ديمه

لذه كامله وبلا قوافي

ميزاني قلبي
وخيال قده قد الفيافي

عل قد عرضه
عل قد عينيه
عل قد وساعه
عل قد فموا
عل قد هموا
عل قد دراعوا
عل قد سكاتوا
عل قد اصداعوا

بين يديه يانا عود
تانترطى
مولفني نبات بلا غطى

نعواج مانتكرض
….
شكون قال؟؟؟!!!
غ كيه وكان
ولا غ هضره وحكايه عل لمحان
لا….. ياله
لا ياسيدي

هي جدبه مجدره
هي غمه مقدره
قلب مجروح
بليه سكنت فراس مريوح
عيطه
من جبال..
عقل فراس لهبال
لسان تايعيط:
عتقوا الروح …!!!
عتقوا الروح….!!!

كانه حامله
بغات تولد
باغيه غ لفكاك
حرف بعيونه عفاك
مداده دم
مكلكل كحل من غراب
محبوس وحابس..
مالتحت مالفوق
خانق لعروق…

الشوفه 5

دازت حياةوخلات
شمته ونص كيه
ف الدواخل بقات
بنادم مكبل بمصارنه
مبرقق عينه يشوف
مخلوق مغبون هالكه

الخوف

حلم ماصدق
قمر طلع
ماضوا ماشرق
عين غ شافت الدنيا
روح ماعاشت ك بغات

الشوفه 6
هاهي:
تاتكر تاتقول الحق
هاهي ضربتها الفيقه
هاهي خنتها الضيقه
هاهي تقطر

ف حلق الزمان بالليقه

تقامت غاليه

ثمنها دقه وتفليقه

ها علاش مشى زعفان لفقيه
ها علاش هذ الفم
تايفوت السبان من لهيه

ها البراد باش عامر
ها الروح تاتقلى
ها ليام تحتها مجامر
ها لمحان

هاش…باقي
هاش…كان
هاهي تخرج مطروزه من هذ اللسان

الشوفه7
ـــــــــــــــــــــــ

أش قالت اللبوه للسبع
تبوصتي والليل داز بلا نفع
ها عمر عل كده وضاع

والعساسه!!!!!!
راني بالله والشرع
غ بنادم والفرحه
عاطياه بالتساع

الشوفه 8

حلفت مانبقى فيا
غدايد
قلت نبقى ف الوقت
نحكمه
وأنا عليه قايد
ندفني خارج علي
نطمرني بعيد علي
كيه بكيه
….

نخوي كل ما
فيــــــــــــــــــــــــــــــــــا

حرف بحوف
نقطه بنقطه
حتى تنشف مني لحلام
ويعمر واد لكلام
يجرني معاه يبعدني عل الخوف
قلبي ميزاني وعقلي صروف
راه ماشي غير أجي

ووزن لحروف

الحرف نور
ف سما لخيال يبان
شعاع
فذاك البعد ف اللور
….
الحرف مانسبه ليا
غ يلا ماجبدته من القاع

ياك الكانه كانتي وانا ملاها
ياك المعنى مني خرجت
وانا اللي نعرف أش مشى معاها
ياك اللسان لساني
نحركه ك بغيت
والكلام معاني ..
والخاطر والحديث

الشوفه9

هاني تمه
مكرع غمه
شبعان هم
واللي بغى يعرف يعرف
واللي بغى يفهم يفهم

الشوفه 10
ــــــــــــــــــــ
جوج حاجات
مايتنساوش لبنادم قالو:
فين خلاوا دار بوه
فين اكل وشبع

أنا الشايط من لمحان
نقول :
حتى حد ماعنده الحق
قبل مني ف القول
غدي نجبدها باللي فيها

نقولها واللي ليها ليها

هذ الارض غ شفناها
ماعشنا فيـــــــــــــــــــــــها

شفت الحق
فروج تايقاقي
والجوع مفرعن ف الزناقي
الهم تايهرنن سبع
القهره من كل لون من كل نوع
بسبع ريوس
ياما خنقت قبالتي النفوس

الشوفه 11
ـــــــــــــــــــــ
شفت والوا
موكي عل الحيط
بشريط رابط سروالوا
عل قلت النفع
تايدردك ك الجدع
شفت الزمان بهراوته
ف الناس تيقمع
ياماشفت!!!!!
شفت شـــــــــــــــــــــــــــــــــي
لتحت
حتى ف كرشه ماشبع
وشــــــــــــــــــــــــــــــــــــــــــي
لفوق غ تايركـــــــــــــــــــــــع

لا رحمه منه تنزل
لا عين شافت
لا قلب وجع

الشوفه12
ـــــــــــــــ

خليني بلاش من هذ الهضره
بغيت نخرج مني نبعد عليا
باش نبرا

نبقى حلمه
نطير مع الريح نغمه

من وذن لوذن
من سما لسما

نطمرني نعمه
وانا تانشوفني
تانتدفن بالفن

حرف غريب بيض منقي
من لعفن
ماتفهمش حتى مع راسوا
خوته مازادوه غ وسواسوا

عفاك من بالي حيد
وكلها يديها فراسوا
خليني نغرسني غدايد
نكون جنان
والرحمه نازله عل غراسوا

الشوفه13
هكذا بديت نشوف
من نهار فتحت عيني
ف المعنى
بغيت نقول من نهار فيقتني
ف فياق النعاس
من نهار عرفت شكون أنا
وشكون الناس

من نهار قطعت لياس
وفصلت لكلام لباس
وتغطيت بالمعنى وباس

الشوفه14
شكون يعرف يخيط الما؟؟
شكون يقد يفصل الحكمه؟؟
شكون يحكي على التعلاق ف الخيال؟؟
شكون يحكي عل الهم
اللي لساق ف البال؟؟
شكون قبط بيده ف السما؟؟
شكون بانتليه الكلمه نجمه؟
شكون تفك من راسه؟
وخرج من الزحمه

الشوفه 15
ــــــــــــــــــــــــــ
ملي خرجت من عروقي
ونزلتني ثقال من فوقي
ودوقني بدوقي
وانا باقي غ مع كانتي وشوقي

الشوفه 16
متيغيلفني غ هذاك:
اللي فيه كثرة التناوي
والجبهه قاصحه
والراس خاوي

الشوفه 17
ـــــــــــــــــــــــ

هاهو حرف كان بعيد ف الفيافي
مافيه لا غميز لا تلاوي
مايعادي مايحافي
جاي من لخلا ولوطى
ولوطاوي

ف بلاد الشيح والريح
فين ماكاين لا بيع لا شرى
فين كاين غ لفوق
لا اللي يشمت
لا اللي يدخل سوق
فين تاتبان الدنيا قد قد
مواطيه مساويه
فين الارض واسعه وخاويه

فين تايعيش الشوق
فين كاين خرجان السوق

الشوفه 18
تماك تنقيل نحفر
مكين حدايا ناس
بلا مكدي بلا فاس
تنحك لهضره
بالنظره
حتى تاتولي تبرق ماس

تماك ماتنديها فشي
تانتهنى من كل
شـــــــــــــــــــــــــــــــــي
تنعركها معاني
وتنبات معـــــــــــــــــشي

تنزطم عل كل شي
وتنسى شي
علي زاطم
تماك تنفهم باللي كل
شـــــــــــــــــــــــــي
معمر بالهم
حتى تيهرق من الفم

الشوفه19
ــــــــــــــــــــــ
بنادم تايشبه لبنادم
قاطعين الحس
غ كسدات
تاتطلع وتهبط فيهم النفس
قارمين ماعرفين الحياة فين
السكات والبكى بالحس
والشخيـــــــــــــــــــــــــــــر

تاتسمع غير بخير بخير

وليام دافعه عليهم كبير
دايزه تاتطير
مطلوقه عل اربعه
حمامه ف السما بجنحان
حلامه ماخلات غ طبايع لمحان

تنهيدة طالعه وتكوي
حلم راسه مشوط
راس مفرنس مشوي

العمر مشى حزق
اللي خدا خدا
واللي سرق سرق
اللي باع باع واللي شرى شرى

بلاد على كدها مخبيه ف سويسرا

شاط لينا الدل ولغنا
عشنا موالفين مع خوفنا
الحال هو هو
الهموم ماعندها دوا
القتال ماهرب
ماخوا
دية المقتول خالصناها
من دم جوفنا
هاحنا
معاندين الارض حتى تفنى
وتانا الدل والجوع ولهنا

كلشي يفهم
كل شي …يكذي على …كل شي
كل شي مهموم مفتون
شكون يلوم شكون

كل شي عارف
هارف معاشر هارف..
القلوب عطات صداها
الصدا مايغسله صابون

الشوفه 20
ــــــــــــــــ
خليوني لا تجبدولي لساني
خليوني فخاطري
عفاكم هاني
باغي نبقى

مع العشاق
بالضو نتسقى
بعيد عل لكذوب والنفاق
خليوني نبقى ف خنافر الزمان

واحد منكم عاق
خليوني ك هذاك
تايقلب عل عبله
وريوني منين تاتشرق الشمس
وفين جات القبله
حتى نكمل القصيد ةعاد
قد قد مع لعمر
كتبوني عنوانها عل مشهد

لقبر
العشاق كلهم بكاوا
ماشي غ أنا وعنتر

خليوني نخوا
شهوه ف الدنيا
خرجوني من لخوا
روح
ف السما عطرها يفوح
راه اللي فيا ماهناني
بحر
بمواجه مافاض
ريح بعجاجه
من دواخلي يسوط
الزايد مني كتفانه غلاض

خارج من الضيق عجب
غ كلام ومكسي بريش
داير التساع من راسوا
توسع ف دحاسه
واعطى للمعنى فين تعيش

ما هي ف الارض ماهي ف السما
هي غ كلمه تابعه كلمه
مدرحه بالحكمه

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع