أخر تحديث : الخميس 23 أغسطس 2012 - 1:54 مساءً

حلف الطير حتى يموت ف الضو!!!

الزجال المفضل الياموني | بتاريخ 23 أغسطس, 2012 | قراءة


كل خطوه لقــــــــــــــــدام…

تاتكلف عرام ديال لحلام

وكل شعلة ف القدام تايخصها

جبال ديال لكلام ….وكل جبل


تانحتاجوا منه غير راسه

شحال تيشهيني الضو….

الضو ثاج الحياة…

بلا به طيري تايتخنقوا انفاسه

***
أنا فعار ملايكة النور

راني ماشي اللي شفتوا …!!

شعلوني تلقاوني واحد آخور

ماهرق مني غير القليل ف المعنى

شرعوني ..

راني مازال تنحصر بحــــــــــــــــور

***
قتلوني بيناتكم وأنا شاعل

احييوني حداكم ..أنتما مجاجي

خليوني حتى يوصل علي الماجي..

يلقاني تارك فاعـــــــــــــــــــــل
***
الموت ف الضو حياة

الحياة ف الظلام

من اخيب الصفات
**
خليوني مع اللي يعلمني نجبد مخي

خليوني نتعلم نسخى ونعيش سخي…

نطمع ف الجايات
ونسخى باللي فات

اللي تعلم يجبد مخوا بخياله.

ماشي هو اللي يجبد زغب ليحيتوا

ويقرطط سرواله..

ويمشط اللحيات.
**
مايألمني غير الطير المقهور

تايظل يزاوك ..ف ملك النور

تايحلم باش الارض تشرق

تشرق فيه باش يبرق
يبين للعالم الكلور

***

ماتيقتلوني غير غير حصارين الما

غالقين الويدان …

متلفينها عل البحور
**
حاسدين الارض….

معصبين عليها …حتاش تادور..

**.
ياعباد الظلام وقتاش كانت الارض ؟

باش تعلق ف السما غير للديكور

**

الجهل نار
الجهل عار
الجهل جار

والجاهل مجرور
***
الارض معنى نص منها ديما
معطي للشمس فابور

ونص للهمس
واللي تايشيط

تايشبطلها ف اللور
***

يالمولفين اللور..
خليوها تدور …حتى نلقاوا عنصر الضوا

ومنين تايفور؟

آش تايعني القهر…..؟؟

يلا ماكان حـــــــــــــــــــــد ف الدنيا مقهور

آش تايعني الكلام؟

يلا ماكان دماغ ف الوراق معصــــــــــور

آش تاتعني المعاني ؟

يلا ماقدت تبقى فكل العصور..

تايقولي عقلي:
يلا ضاقت بك مشي فيك

توسع منك وعليك

حتى تلقى لروحك فين تدور…

تايقولي قلبي
بنادم مصباح
تيخلق ف الارض مطمور

من بعد…
كاين اللي تيشعل نار
وكاين اللي تيشعل بالنور.

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع