أخر تحديث : السبت 20 يوليو 2013 - 1:13 صباحًا

خليتني ف اللور ….

المفضل الياموني | بتاريخ 20 يوليو, 2013 | قراءة

عضتني يدي ….ملي كنت تنشوف ف راسي ..
تنحنزز فيا
وأنا تنزرفني ليا ..
أنااللي فتلت الشريط بيدي
وكتفتني وعلاش نندم ..
كنت قبري كراسي ..غرست فيا نيابي
وضراسي ..
اللي تقطعت من الجدر ماتحشم
كنت حلمة خضره وجدرها قهوي
بنت الآصل..
من عضم ولحم ..ف قلب مكوي ..
بنظره …!
نظره ماوجداش ..
دري قبالة حياة ..كيف والوا..
كيف بلاش…
مالمسها مالمساته
مالبساته مالبسها ..
مابسته ماشافته
ماشافهاش ..
(نضو نضو…)
***
واللي جات من غرق الحياة
ماعندها علاش تخمم ..
***
اعطيت راسي للسفر مانعاودشي الكلام
عطيت راسي لجهة اللور ..
قلتها قلتها …ومازال في مايتقال..
فين معربط القدام …
فين عروق النور ..
مازال مابديت في الهضره..
فين جدور السم
يلا وقفت …!!غير تانتسنى روحي تدوز ..
تفوت الدحاس ..تفوت القبر ..
حتى يتوحشوها الناس ..
ويلا تعطلت معطلاني المعاني ..
عليها تاندور
وأنا المعني..
معاني القهر وأنا المقهور…..
عهدي بيا تذبحت وماسالتش مني قطرة ديال الدم
عهدي بيا (كان نكون)…ف كرش الوجود..
تانوزنني عل الحروف ..
وأنا فوق جسد القصيدة ممدود ..
مديتني عل حرف النون
عهدي بيا تنخليني بلا خوف
تنقذفني كيف المجنون ..
رميتني فيد الحرف…
نكن قرطاسه نكون …
نكون غبره ورمادي ..
مرفوعه ف الرفوف نكون…
نكون فم بشلا لسون ..
نكون سكين يقطع قرفاده هذاك الحلوف …
التاريخ غير قالب ..
كيف عيشتنا ..ف هذ البلاصه من الأرض..
بلا كرامه بلا هنا بلا سلام
الحظ غير كلام …ضيق ..
مايتساعش لهذ لحلام
ــــــــــ

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع