أخر تحديث : Friday 12 December 2014 - 8:11 PM

وصيه.. للما..

المفضل الياموني | بتاريخ 12 Dec, 2014 | قراءة

www.ksarforum.com_photos_writers_yamouni

اغسلني..من وسخ ليام
فركني ..
عصرني من وجع لوحام
…..
نقطر…نتقطر
طال لعمر ولا قصر
نبقى ف حيط التاريخ
رشام
معنى مستف
واقف
ضارب لقمر للكتف
منوض ف الارض عجاج
مسكد
عنق الزمان اللي عواج
من فوقي نور
من تحتي هايجه
بحور
انا الراضع من بزولة الحياه
دغاس الحكره
انا الحاصد من فدادن لعمر
شوك السدرة…
انا الشايط خيال
من لمحان
واقف ..
انسان
صبني لا تطير صباغتي
خليني ف الضو
لا تفطمني حتى نكمل رضاعتي
بغيت نزرعني ف الماجي
جدر
نقطعني
من صرة لحجر
نهار نسكت انا
انت هضر
بكانتي
شربني حتى نسكر
بالضو
دوخني
حتى يتبدل الجو..
خبيني..من ليام
فكرش لوهام
كني بسمه ف ارض لحلام
دوق….معصر من الشوق
لون …بسبع لسون
فن بين الفنون
فصلني قد قد
لا تنقص لا تزيد
جيبني روام
انا والكلمة
نكونوا توام
نخرجوا معنى
من ضيق الزحام

 

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع