أخر تحديث : الإثنين 4 مايو 2015 - 9:44 مساءً

نبي ..ــ…وف جهنم

المفضل الياموني | بتاريخ 4 مايو, 2015 | قراءة

www.ksarforum.com_photos_writers_yamouni

خمم
مشي وأجي وشوف
تصرف وصرف:
عضيماتك ,جليداتك
عويناتك
,,,,,,,,,,,,,,,,,,,,,,,,,,,,,,,, حروف
توسع بالنفع ,
رخف المقبوض
طلق الشوف
فك عينيك
الواحله ف الجوف
عاون فيك الإنسان
حتى يفيق
,,,,,,,,,,,,,,حتى ينوض
ف الصبر
وقف ف وجه الخوف
وقفة العسكر
إعطيك للتيساع, يدير ما بغى فيك
خليه يتوسع أكثر
تكـــــــــــــــــــاد مع لفوق
ف الفوق …
ساوي كتافك مع لكتاف..
كن لسوقك سوق
ف السفر لا تدهش لا تخاف
شوف بعيد …
وزيد
جنب الشمس حدا القمر
كتفه مع كتفه
عمر بالكرم, بالنخوه بالمحبة
وكثر من لوفى
خلي الحب يجمع فيك
الوقفة
خلي الوقفه تطلع منك نور
عاودك .عاودك ……
عاود كن
واحدآخور ف الصفه
فيض على حالتك
بحور …
من المحبة
الكره حجر والحسد سور
شرق
لمع
شعل
صبغ العالم
إعطيه لون
صفة ف عينك
معنى ف قلبك ف وجدانك من روحك
صيغه ديكور
خويه
كنسه من القبح
فرشك له
لفين يكون المستور
خلي لفوق يمشي فيك
خلي لتحت يشرق بك
خلي بعضك يرقى بك
خلي كلك ..
لفين تغني الطيور
صفيك منك فيك عليك
وسع الضيق لصياحك
كن خيطها وهي جراحك
كن قرطاسها وهي سلاحك
كن فارسها وهي رماحك
كن فجرها وهي صباحك
كن عسلها وهي النحله
اللي تزنزن ف جباحك
راك فريد أملاي
ف الصفة
وحداني
ف الخلفه
جماعه وحدك ف السفر
وحيد ف النيه ولوفى
ذاك الغادي
وغير مهيطاه لرياح
ماشي ك اللي دافعاه الرجفه
ذاك اللي هازه الما
ماشي ك اللي ضبره ف الكتفه
هذا زمانك
وأنت ملاه
هذا كلامك وأنت اللي تعرف المطوي ف جواه
غصه …
يدفعها شهيق
آه ..تخنقت ..
مسروطه عل الريق
حلمه ومقاتله مع الخـــــــــــاوي
غدا معمر بالتلاوي
ماجا ماراح ماخلاها تروح
مامشى ماباح ماخلاها تبوح
هي غير هبره
وكلمها الحال
هي غير لحمه ودمها سؤال
شهقه
من فم الموت شرقت
بسمة ف فم الحياة غرقت
صوره ف حنجورة البال زهقت
تنهيده من عين الحال هرقت
جرحه بالمحال تعقرت
والدري الصغير
باقي هو هو ..
وخا الراس شايب…
وخا القلب طايب …
مازال ما تهرس راسه مازال ماتايب
مايحني ….مايركع
مايمسح كابه للضبع
ماينفض كتفان للسبع
مسح حروفه وشرق
غسل كلامه ونطق
الكتبه سفر وقهر
يزمم القهر
الكتبه هم وعداوه أكثر وأكثر
الراس غ طريق
من جبال وتراب وحجــــــــــــــــر
مشي برجل الصبر..
مشي برجل الصبر

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع