أخر تحديث : السبت 27 سبتمبر 2014 - 10:23 مساءً

شَعْشَعْ يَا شَعْشُوعْ

بشرائيل الشاوي | بتاريخ 27 سبتمبر, 2014 | قراءة

شَعْشَعْ شَعْشَعْ  يَا شَعْشُوعْ
هاذا وقت كلشي مبدوع
ما كليتي ما شرابتي
غير الظلم لي امرتي٠
ما اعطيتي ما ارحمتي
غير الرشوة لي نفقتي٠
لي طالب ولا مطلوب
الحق معاك و لا ممنوع٠
شَعْشَعْ شَعْشَعْ  يَا شَعْشُوعْ
هاذا وقت كلشي مبدوع
الرجلين ولاو الفوق
القلب الحنين ولا مفروق٠
يا الهجالة يا المسكينة
كان الوقف  زمان يعطيك
دابا الضو ولا يصليك٠
يا اللقالق فوق الشجر
ما بقى غصن ما بقى تمر
قول لولدك سير انتحر٠
شَعْشَعْ شَعْشَعْ  يَا شَعْشُوعْ
هاذا وقت كلشي مبدوع
يا الجوامع المنسية
حسرة و حسرة على رجالك
في مدينة الأولية ٠
خصخص خصخص يا خصخاص
زيد بيع ، كلشي مبيوع٠
٠
شَعْشَعْ شَعْشَعْ  يَا شَعْشُوعْ
هاذا وقت كلشي مبدوع
صيدي صيدي يا سفينة
اما الحوت ديما مقطوع٠
بالدين اعطي شعارات
و للحق انتى ملهوع٠
شَعْشَعْ شَعْشَعْ  يَا شَعْشُوعْ
هاذا وقت كلشي مبدوع
يا هاذا فكر شوية
كن معقول ترجع متبوع
لبقيتي على هاد الحال
كي نخل سيدي يعقوب
من الجذر تولي مخلوع.
شَعْشَعْ شَعْشَعْ  يَا شَعْشُوعْ
هاذا وقت ولاد الجوع
جات ايامك يا ايام
فق من نعاسك يا المخدوع٠

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع