أخر تحديث : الأربعاء 2 ديسمبر 2015 - 11:17 مساءً

حط الخاطر عل الڭانه

المفضل الياموني | بتاريخ 2 ديسمبر, 2015 | قراءة

www.ksarforum.com_photos_writers_yamouni

حط الخاطر عل الڭانه
وتوكل عل ملانا
…وغرق ف البال
من سؤال لسؤال
عهدي به عطاني لكلمتي
أمانة …
عهدي به تالف
مابين اللي تقال
واللي مازال عل أكتافي ثقال
عهدي به واقف على ماقتلوا أنا
خرجت مالقيت غير أنا
وأنا وأنا ….
خرجت مالقيت غير بوحدي
بوحدو…
كيولول ..
.قبالت الخوا
لقيت عمر
عرقان ف الزحام
لقيت حياة هارب بها الريح
ماشفتها
من ذاك العام
لقيتني عيشة من داخل خاوية
من برا عامره حلام
لقيتني من ورا الشوفه
رعشه
مخبياني ما
ف ظهر السما
غمة وغمام
لقيتني قدر معلق
ف كرش ليام
حلمة أخرى
فاتها لوحام
لقيتني
شهوة كاطل
من باب السما
معليه عينها فالما
كاتسنى الباب يتحل
حريف
غير ف كلمته حصل …
أح ….
تكرض …
ماتهرس ماطاح
بين الضلوع
كية
زهقت ف بوحشيشه
ماهي للهبوط ماهي للطلوع
خد ناشف
بال تالف
تابع دمعة وحدانية
لقيتني أكثر …
لقيتني حنين جيبته معايا من القصر
لقيتني سنين ديال الهم والزمر
لقيتني روح
سابقاني للدفتر
بكى حيران
يتختر
مابين النظر والشفر
غي بيني وبيني
شاعل كمرة
ضاوي
تارك فاعل
الروح جيعانه بالخاوي
والكرش عامرة
بالتلاوي ..
والقلب عادف الصبر
لقيتني مخبي ف راسي كدية
وكارفه علي الحسره
هربان من الحضية
وحال هجره له الذل
لقيتني ندامه ف خدي تدفل
واقيلة شكيت
ماشي أنا هذاك
واقيلة عقلي خرف ولى يزكل
واقيلةهذيك شي روح
باغيه من هذ الكسده تسل …

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع