أخر تحديث : الأحد 30 أغسطس 2015 - 6:48 مساءً

المناضل الحقيقي

جمال البكاي | بتاريخ 30 أغسطس, 2015 | قراءة

jamal_bekkai

المناضل الحقيقي ماشي هوا شباط ولا بنكيران ولا لشكر … المناضل الحقيقي هيا واحد السيدة تلاقيتها فدوار بشويكا عندها جوج دراري فيهم بنت معاقة دهنيا وجسديا وولد مكيشوفش وكتنوض كل نهار مع 6 ديال الصبح باش تمشي تخدم فالقهوة من أجل 40 درهم فالنهار …

المناضل الحقيقي ماشي هوا لي كيدخل للحلقية باش يرفع شارة النصر ويهضر على العدالة الإجتماعية .. المناضل الحقيقي هيا واحد المرا جلست حدايا فالطران وغير وصلنا جيهت سيدي اليمني بدات تعاودلي أنها غادا تزور ولدها لي فالحبس مخبْيا من راجلها وأنو خاصها ترجع مع الجوج باش تمشي تخدم فالدار عند واحد الناس لاباس عليهوم بجوج فرنك فالشهر ..

المناضل الحقيقي ماشي هوا أنا ولا نتا ولا نتي لي النهار ومطال وحنا كنحاربو الفساد افتراضيا .. المناضل الحقيقي هوا داك السيد لي خاصو يْوجَّد كل ثلتيام 750 درهم باش يدير الدياليز من أجل التشبث ما أمكن بالحياة ..

المناضل الحقيقي ماشي هوا نبيل بنعبد الله ولا ياسمينة بادو و ولا رئيس مجلس المستشارين .. المناضل الحقيقي هيا داك المرا لي كتفرش الكارطون حدا المحطة ديال الطران لقديمة وكتنعس مغطيا بمانطا باليا فوق منها ميكا بلاستيك من أجل مقاومة البرد..

المناضل الحقيقي ماشي هوا وكيل الائحة لي عمرني شفتو تا لهاد ليام .. المناضلين الحقيقين هوما واليدينا لي عمرهوم تخلاو علينا وداقو المر والحلو من أجل باش نقراو بحال الناس و نخدمو ونفرحوهم ..

المناضل الحقيقي ماشي هوا بشار الأسد ولا داعش ولا الدراري لي كيمشيو يفجرو راسهوم من أجل لاشيء .. المناضلين الحقيقيين هوما اللآجئين السوريين لي تنكرولهم جميع زعماء الوطن العربي ومشاو يتسولو وطن من أجل النجاة من الموت .. هادو هوما المناضلين الحقيقيين تحية نضالية لهم و الله يعاونهوم ..

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع