أخر تحديث : الأربعاء 3 ديسمبر 2014 - 8:53 مساءً

رايبي و طونيك .. وداكشي

ذة. أمينة الصيباري | بتاريخ 3 ديسمبر, 2014 | قراءة

www.ksarforum.com_photos_writers_amina saibari

يوم من أيام العطارة في مداشر الوطن .طرقات مغسولة بالمطر و تربة بلون الشوكولا . أغاني هاني شاكر حتى يكون لحزن الفصل معنى و وجبة من محل على الطريق لم افكر فيها كثيرا لانها بقيت عالقة بذهني منذ أيام وأنا أستمع لزوبيدة وهي تحدث إبن أختها عن ما يمكنها جلبه معها من طورينو حين زيارتها لهم في موناكو . أوصى الصغير أكثر من مرة على رايبي جميلة .

المغاربة هما هادو ما كيرتاحو حتى كيرسخو رموز الوطن في ذهن الأطفال ورايبي جميلة لا محالة يتربع على رأس الائحة مع هنريس وطونيك والزريعة الراعي الرسمي لوزارة التربية الوطنية واحد الجيل محال كان يقرا كون ماكانتش الزريعة هادشي فالوقت لي كانو مالين الزريعة كيبيعوا الزريعة اما دابا هدرة اخرى .. المهم من نهار سمعت الولد مصمم عل رايبي جميلة وهو فبالي حتى اليوم وانا نتغدى بيه . سير عالله الواحد هو لي يشد فالهوية ديالتو رايبي جميلة اولاي الله اولاي الله ..هدا مقطع من اشهار قديم . دليل اخر على أن المشروب مقدس.. المغاربة يعني نحن عالام . لي تبعنا يحماق .

المهم كملت رايبي وداكشي ومشيت خدمت براسي مهرس بلا قهوة حيت الادمان صعيب وكاينين شي مؤسسات عارفين هاد المسالة غي كنوقف كيصفطو نيسكافي وشي وحدين مافراسهم والو ولكن مع هاد البوسط غادي يرجع فراسهم.. ماعلينا كملت الخدمة شديت الطريق الدنيا عامرة بدوريات المراقبة وقفوني . الاوراق امادام ؟ بديت كنقلب على الوراق حتى لقيتهم . عطيتهم للدركي عطاهم لواحد السيد اخر بلباس مدني . بديت كنقول مع راسي واش هادي شي مخالفة ولا اش؟؟ زوينة ادا تغدى الواحد ب 5 دراهم وخلص 300 درهم دبال المخالفة . سولت الدركي ياك لآبس اسيدي؟ قالي لاباس غير مراقبة عادية .. عرفت بلي الدعوة فالطربوش شاف الطربوش وقال هادي متكون غي مع شي خلية . ضروري تكون مع شي خلية مصايفطها الاتحاد السوفياتي ولا تكون مع داعش ولا شي مصيبة اخرى . حيت الشابو شبهة كبيرة خص الواحد يرد بالو فمجتمع فيه الطربوش الوطني ومول الكاسكيطة وكل واحد كيمثل تيار .. كنت غادي نقول ليه حنا غي بتوع الاوتوبيس لي مغدين برايبي وطونيك وانا نسكت..المهم الدولة حاضرة بقوة على الطريق اش كيديرو؟ الله اعلم كي البرد يكونو حاضيين الشانطي والقناطر حيت حتى هما مصايبين برايبي وطونيك ..وداكشي

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع