أخر تحديث : الجمعة 13 فبراير 2015 - 10:20 مساءً

الحووووب

ريهام سعيد | بتاريخ 13 فبراير, 2015 | قراءة

Riham_said

بما أن غدا عيد الحب و كلشي كيهضر عليه.. قررت حتى أنا ندير حقي و نهضر عليه شيشوية..
بطبيعة الحال الحب خاصو يكون يوميا, ماشي فشي نهار محدد مبني على شي أسطورة و لا قصة قديمة.. خاص بلا مايحتاج شي واحد يفكرنا و لا يدير لينا نهار خاص, خاصنا نكونوا لراسنا قادرين نحبوا و نتبثوا للأشخاص للي حنا معاهم شحال كنبغيوهم وشحال هوما غاليين عندنا.. بالرغم من أي حاجة مفروض علينا نسرقو ولو غير ساعة من وسط المشاغل ديالنا ونبرهنوا لأحبابنا على أي حاجة جميلة عندنا تجاههم .. هادشي للي مفروض يكون.. و لكن للأسف الشديد أنا فالرأي ديالي حنا مزال مكنعرفوا شنو هو الحب, وما كنعرفوش حتى كيفاش نحبوا . حنا حاليا عندنا غير وهم الحب.. ما حد مزال كنبغيوا نبدلو الشخص للي حنا معاه على حساب للي كيعجبنا .. كنحاولوا نعجنوه ونكونوا شخصيتوا كيما كيريحنا حنا.. نلغيوه هو ونلغيوا أي حاجة فيه ماعجبناش و ماكتلأمش معانا.

ما حد مازال الفيسبوك هو السبب الرئيسي فالصراع مابين اي ثنائي حيث ماكنتيقوش فبعضنا وما كنأمنوش بشي حاجة سميتها التواصل الإجتماعي و بالصداقة ما بين دري و بنت. مازال ماكينش الحب محد مزالين كانخافوا إلا كتاشفنا راسنا ما باغينش نكملوا فشي علاقة ينتقم منا داك الشخص, يهددنا, يشوه صورتنا.. بالرغم من أي حاجة كانت زوينة شي نهار بيناتنا حيث ماكينش شي حاجة سميتها نساليو, نهار للي دخلتي فداك العلاقة وليتي ديال داك الشخص و ما منحقكش تخرجي منها بسهولة. ماحد مازال كاين حب الامتلاك و الشخص كايبغي يرضي الغرور ديالو و فقط.

مازال مكنعرفوش معنا الحب ما حد مازالين كاينين عمليات ترقيع البكرة ومازالين خايفين يعيق بينا الشخص للي كانبغيوه راحنا سمحنا لراسنا نبغيوا شي حد قبل منوا .. و مازال كنوهموا الشخص للي حنا معاه بللي هو الوحيد للي داز فحياتنا..
ما كاينش الحب محد مزال الشرف ديال البنت كيتقاس فغشاء يمكليه يمشي لأسباب عدة من غير أنها تمارس الجنس .

مزال مكاينش الحب ما حد البنت كاتشوف واش الدري عندوا الفلوس و الطموبيل و الدار.. شمن عائلة هو, واش قادر يجيب ليها الكادوا ويديها تسافر.. وما كيهمهاش الشخصية ديالوا, طريقة التعامل ديالوا معاها, وواش هي مرتاحة معاه ولا لا, واش متفاهمين مع بعضياتهم واش كاتحس بالسعادة معاه, ولا الفلوس قادرين ينسيوها فكلشي و قادرة تلغي راسها على ود الناس يقولوا هذيك صاحبت فلان مهللي فيها و مشبعها كادويات.. ياه عندها الزهر , وخا هي ماكتحس بتجاهوا بحتى حاجة من غير أنه بنك متحرك .
مزال ماكينش الحب ما حد الدري كايشوف المؤخرة ديال البنت و لاطاي ديالها وواش قابلة تنعس معاه عاد يفكر واش يبغيها ولا لا .

و أه مزال مكاينش الحب ما حد البنت مزال كادير الحجاب باش يقولوا عليها مربية وتجيب الراجل دغيا . مزال ماكينش الحب ماحد الراجل مزال مللي كيبغي يتزوج كايسيفط مو تقلبلوا على العروسة ولا كايشوف شي وحدة للي ما عمرها خرجات معاه حيث فنظروا هاديك هي المرأة ديال الزمان .

مزال ماكينش الحب ما حد البنت كاتقبل التزوج بأول واحد خطبها من بعد ما كتخرج من علاقة حب فاشلة.. أولا كاتقلب التزوج بللي كان غير باش تهرب من الهضرة ديال الناس وما تبقاش فنظرهم بايرة..
مزال ماكينش الحب مدام مزال حاكمينا المظاهر .. ماحد مازال ماقدرينش نصبروا على بعضنا و نتقبلوا بعضياتنا كيفما كنا بعيوبنا, بأخطأنا, بنواقصنا.. وزيد وزيد وزييييييد و حالات عديدة و كثيرة..

المهم نتيقوا فراسنا باش نقدروا نتيقوا فغيرنا.. نكونوا مرتاحين مع بعضنا كيما حنا بشخصيتنا, بعقدنا, بالخايب و الزوين , نحسوا بالأمان مع الشخص للي حنا معاه وما يهمنا حتى واحد ولا حتى حاجة .. نتعلموا نتحاوروا, نعبروا على الأراء ديالنا و المشاعر ديالنا, نتجاوزوا أي حاجة, يكون عندنا مفهوم التضحية, مفهوم تقبل الإختلافات.. نجربوا للي كايعجبنا و كيعجب الشخص للي حنا معاه بجوج بينا.. نحاولوا نفهموا بعضياتنا هذا هو الأهم ..
2 مختالفين قادرين يحبوا بعضياتهم بدون تغيير.. كل واحد و الكينونة ديالوا .. جربوا غادي تجبروا الحب أجمل هكذا..

عارفة راسي طولت .. قلبي عامر هههههه .. إيني واي هابي فالنتاين.. أي لووف يو أل .

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع