أخر تحديث : الأحد 13 ديسمبر 2015 - 2:17 مساءً

المحروقات والمحروقون

أحمد الدافري | بتاريخ 13 ديسمبر, 2015 | قراءة

eddafri

شركة لاسامير لي كتشري البترول الخام من الخارج وكتستخرج منو البنزين والبوتان والپروپان والگازوال وكتوزعهم علينا فالمغرب، كانت مؤسسة ديال الدولة المغربية قبل عام 1997. جا الاشتراكي سي فتح الله ولعلو فعهد حكومة التناوب التوافقي باع أكثر من 67 فالمائة منها لشركة سويدية كيملكها الملياردير السعودي سي محمد حسين العمودي. هاذ السي العمودي لي مدوّر الحركة مزيان فالسويد من كثرة الاستثمارات والمشاريع لي عاملها ثما، فواحد النهار لقى راسو ما قادرش يخلصش الضرائب الكبيرة لي كتتسالو الخزينة ديال الدولة والجمارك والأبناك المغربية. علاش ؟ هاكاك. قال لك أسيدي شركة لاسامير كانت كتشري البترول الخام بثمن طالع بزاف، ومنين نزل الثمن فالأسواق العالمية تعرضت للخسارة. والدولة والأبناك المغربية خصها تاخذ بعين الاعتبار هاذ الشي، وإلا غادي يغلق الشركة ويعلن على الإفلاس ديالها. هاكاك. إيوا علاش ما كنتيش كتخلص الواجبات ديالك فالحين وخلّيتي الديون تتراكم عليك؟علاش المقاولات المغربية الصغيرة مفروض عليها تخلّص الواجبات ديال الجمارك وديال الضريبة بدون أية مماطلة ؟ المهم. دابا فبداية السنة الأسعار ديال المحروقات غادي تولي حرة، والشركات ديال التوزيع غادي تدخل فمنافسة فيما بينها. الشركات الصغيرة ما غاداش تقدر على المنافسة بطبيعة الحال، وغاديا تخرج من السوق وتجري على العمال ديالها، والشركات الموزعة العملاقة لي ماليها تبارك الله عليهم شخصيات كبيرة فالبلاد، ولي مسموح ليها تستورد المحروقات الجاهزة للاستهلاك من الخارج، غادي يخوا ليها المجال . أما الحكومة الله يكون فعونها، باش تحافظ على المنتوج ديال لاسامير خصها تحل المشكل مع سي محمد العمودي، وتقدر تلقى راسها مضطرة تشري من عندو الأسهم لي عندو فالشركة بشي ثمن كبير. عام 1997 كان سي فتح الله ولعلو الله يجازيه بخير خوصص لاسامير لفائدة الشركة السويدية ديال العمودي بمبلغ 300 مليور دولار فالوقت لي بعض الخبراء قالوا بلي الصفقة ديال التفويت كان ممكن تكون بمبلغ 2 مليار دولار وبلي كانت واحد الشركة كندية مستعدة تعطي هاذ المبلغ. دابا شحال يمكن تقدر الحكومة ديالنا تعطي للعمودي باش نعاود تشري منو لاسامير لي كانت فالأصل ديالنا، باش هاذ الشركة ما تتوقفش على الإنتاج وما يتشردوش العمال لي فيها؟ يالاه. زعموا معه شي شوية.

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع