أخر تحديث : الأربعاء 30 ديسمبر 2015 - 10:18 مساءً

هل تعلم أخي المسلم ماذا تعني القصر الكبير سياحية !!!

خالد الشرادي | بتاريخ 30 ديسمبر, 2015 | قراءة

cherradi

أخبرني صديقي انهم يدرسون تحويل مدينة “القصر الكبير” الى مدينة سياحية !!
هل تعلم أخي المسلم ماذا تعني القصر الكبير سياحية !!! ..
سياحية يعني سبيطار ديال دار الضو، غادي يدخل للنشرة الاخبار ديال روسيا توداي ..
سياحية يعني وزير الخارجية الياباني يدين بشدة حادثة تشريح السياح اليابانيين عرضيا من طرف الطبيب المداوم بالهلال الأحمر، بعد تشريحهم طوليا من طرف مرشد سياحي من ” الطابية” ..
سياحية يعني الجوطية ديال المحلا غادي تولي كتبيع الكاميرات ديال كانون آش دي بلاصت التينيسات ديال ويمبلدون 1950 والطيسان ديال المياضي لي كيتباعو دابا .
سياحية يعني القهوة ديال الصطاسيون غادي تولي سميتها كاسا دي إطاليا وزويزن مول الزريع غادي يفتح” بار بلايا ” على القنطرة ديال الرد”.
والنادي الرياضي القصري غادي يعلق يونيسيف فالتوني بقوة الفائض ديال الميزانية لي عندو .
سياحية يعني نقدو نجيبو خوسي ماريا أزنار يشبرلنا المجلس المجلس البلدي ..
سياحية يعني الجبانية ديال النصارى غادي تولي ملعب ديال الغولف والحمام ديال الهداجي غادي يولي” SPA” والكامبو ديال دار الدخان غادي يولي سميتو” آليانز احميدو ولد لحبيب”.
سياحية يعني الشفارة ديال الحومة مغاديش يبقاو يسرقو الحوايج من السلوكا ديال النشير و غادي يوليو كييبيعو التذاكر ديال الديربي مع حسنية العرائش للخليجين .
سياحية يعني انجيلينا جولي غادي دوز هاد راس العام فالعوامرة بعيدا عن الباباراتزي.. هي وبراد بيت وهنري كيسينجر .
سياحية يعني مغاديش نبقاو نطلعو فالصيف نغرقو فبيليغروسا .. وغادي نجلسو مع راسنا نغرقو فالاستثمارات ديال دبي القابضة على الدص …
سياحية إييييييييييييه يا سياحية ..

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع