أخر تحديث : الأحد 24 يناير 2016 - 11:15 صباحًا

الله يرحم الوالدين

أحمد الدافري | بتاريخ 23 يناير, 2016 | قراءة

eddafri

فيونيو 1986 كنت كندوّز الامتحانات ديال السنة الثالثة فالمدرسة العليا للأساتذة. كان المنتخب المغربي ذيك الوقت مشارك فكأس العالم ديال المكسيك. الراس كان باقي صغير. ومطنطن بالأحلام والمشاريع. المنحة خمسمية وربعين درهم وسبعة ديال الدراهم فالشهر. فيها الماكلة والكرا والطوبيس والگارو والحشيش والدوران من قهوة لقهوة وتخراج العينبن وشوية ديال قلة الحيا وبزاف ديال التحنزيز. القباحة وصافي. من بعد ما دوّزت آخر امتحان مشيت نتفرّج فواحد القهوة فحي التقدم فالماتش ديال الفينال بين ألمانيا الغربية بالرومينيگي ديالها والأرجنتين بمارادونا وبوروتشاغا لي كان كيطير مع الطيور. كنت جالس مع جوج ديال الدراري كنعرفهم مبليين بحالي. كان فيدّي جْوان ديال الحشيش. وقفت صطافيت فباب القهوة وتلاحوا منها البوليس. الجوانات بقاو كيتّرماو تحت الطوابل والقيامة ناضت فالقهوة. لحْت الجوان ديالي فالأرض وزطمت عليه بالشوية ربما باقي نحتاجو. وقفوا عند راسنا فالطابلة جوج بوليس. واحد منهم لابس جاكيت ديال الجلد وسنانو مخزّزين بحال إيلا كيكمي الكيف. قال لي : كنتي كتكمي الحشيش. قلت ليه : جيت للقهوة نتفرج فالماتش ماشي باش نكمي الحشيش. طلب منا نوريوه لاكارط ناسيونال. جبدت لاكارط ناسيونال ومعها بطاقة خضراء فيها صورتي ومكتوب فيها طالب أستاذ فالمدرسة العليا للأساتذة بالتقدم الرباط. شاف البطاقة ديال الطالب لي فيها مجموعة ديال المعلومات وقال لي: غادي تولّي تقرّي الماط. ضحكت و قلت ليه: إذا ما هزّيتيناش هاذ العشية أ الشاف فالصطافيت….. المهم فلتنا ذيك النهار. حيت طحنا مع بوليس ولاد الناس. و اتّقاو فينا وجه الله.
دابا غدا إن شاء الله شي وليدات وبنيتات من شباب هاد البلاد باغين يعملوا تظاهرة فالرباط يطالبوا فيها بحقهم. كلهم قاريين وعندهم مستوى.. من المفروض باش العام الجاي يقرّيو ولاد الشعب.. عافاك آ سي محمد الحصاد ما تضربهومش للراس. وأنا مزاوك فيك آ سي بنكيران حل ليهم المشكل ديالهم وما تبقاش تهددهم. راهم وليداتك. وما غاديش يخرجوا باش يطالبوا بالحق فالتدخين ديال الحشيش. باغينكم غير تحنوا وتشفقوا من حالتهم وحالة والديهم لي ممحّنين معاهم. أنا مزاوگ.

 ksarforum
أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع