أخر تحديث : الأحد 14 فبراير 2016 - 5:05 مساءً

التواصل الملكي

أحمد الدافري | بتاريخ 14 فبراير, 2016 | قراءة

1455446115

جوج ديال الصفحات صبحو اليوم هنا فهاذ الفضاء فيهم الصورة ديال الملك ورمز المملكة المغربية. الأولى اسمها الديوان الملكي والثانية اسمها الديوان الملكي المغربي، ووصلوا بجوج لحوالي 1100 من المعجبين لحد هاذ الساعة. لي عملو هاذ جوج الصفحات كيطلبوا من المواطنين يتصلوا بيهم بخصوص أي تقصير فالخدمة من أية جهة كانت، إما من خلال التعليقات فالصفحات أو عن طريق بريد إلكتروني gmail. دابا الأسئلة لي يمكن نطرحوها حنا المواطنين بخصوص هاذ جوج الصفحات هي :علاش كاين جوج صفحات بنفس التصميم وباسم مختلف؟. وعلاش الديوان الملكي ما قامش بإصدار بلاغ رسمي بخصوص الإقدام ديالو على إنشاء هاذ جوج صفحات ووكالة المغرب العربي تعمم هاذ البلاغ على وسائل الإعلام؟ وعلاش ما يكونش التواصل مع الديوان الملكي من خلال سيرڤور خاص بهاذ المؤسسة حرصاً على الأمن الإلكتروني وحماية للمعلومات، عوض ما يكون عن طريق gmail، فالوقت لي بحال هاذ الحساب الأخير سهل الاختراق من عند القراصنة؟ وشنو المعنى ديال فتح المجال علانية وأمام الملأ للناس يكتبوا التعاليق ديالهم فهاذ جوج الصفحات بحال إيلا هاذ الصفحات هي وكالات خدماتية متخصصة فالحل ديال مشاكل المواطنين بينما من المفروض أن مؤسسات دستورية أخرى هي لي خصها تحل هاذ المشاكل؟
التواصل مع الملك مزيان يكون فهاذ الفضاء. ولكن التواصل عندو شروطو ومقوماتو. وراه من السهل على أي نصّاب يعمل فهاذ الفضاء أي صفحة بغى. لذلك الأمور خصها تكون معمولة فإطار الضوابط ديال التواصل باش هاذ التواصل يحقق الأهداف ديالو. والأصدقاء ديالي هنا لي سيفطو ليا دعوة ديال “الحب” ديال وحدة من هاذ جوج صفحات، كنعتذر ليهم على عدم تلبية دعوة هاذ الحب، واخا هاذ النهار هو يوم للحب بموجب قرار من شي جهة والله ما عارفها شكون، وهو اعتذار ناتج على الاعتبارات السابقة أوّلا، وثانيا لأنني ضيجا ساقط فالحب وقلبي عامر بالهوى والغرام

 

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع