أخر تحديث : الخميس 22 أكتوبر 2015 - 9:24 مساءً

رأي في “الخدمة الاجبارية” للأطباء

أميمة الحاجي | بتاريخ 22 أكتوبر, 2015 | قراءة

12049348_1496447854013782_5002834690566388484_n

لأول مرة نكتب منشور على قرار “الخدمة الاجبارية” ..و مع كامل احتراماتي لكل الجهات …
أولا ..مدة دراسة الطب را طويلة (8سنوات) لكن هذا ماشي عائق امام التلاميذ اللي دخلو للكلية عن جدارة و استحقاق و قناعة و حب الميدان …لكن ديك الفلوس اللي كياخدوهوم الأطباء المقيمين و الداخليين رامبلغ لا يعقل (110دراهم في الشهر) ..زيادة على التكوين الهزيل و الظروف المزرية اللي كيخدمو فيها داخل المستشفيات (دخلت شوفت بعيني شكايناا…) ..و في الاخير و بعد الحصول على شهادة الدكتوراه ..يمشي مسكين للمناطق النائية -اللي طبعا تا هوما عندوم الحق في التطبيب و الخدمات الصحية -ودون معدات و لا وسائل طبية (السكانير اللخر ما كايناش) و بستيلو و ورقة و بيرو مشخشخ و يسيفط المرضى ديالو بشوية د “المجهود”للمستشفيات المدنية لتلقي العلاج..واش هذا معقول نسكتو الناس و نقولولم عندكوم طبيب فالمنطقة ديالكم ؟ و زيادة على هادشي يتخلص 2000 درهم ف الشهر (ماشي تا ديال مصاريف السكن و التنقل) و يرجع للدار ديالوم يشومي و يولي عالة على واليديه ..هداك ما عندوش الحق يعيش تا هو هاااني و يخدم المرضى ديالو على اكمل وجه و ما يحسشي بتأنيب الضمير و العجز ملي يموتلو شي مواطن فيدو ؟
ثانيا ..الدكتوراه في الطب هي ليست دكتوراه وطنية ..يعني الا حالفك الحظ و لقيتي خديمة مع الدولة ..عتخلص بحالك بحال واحد عندو الماستر ..
تالثا …مناصب التوظيف العمومي للأطباء في قطاع الصحة لا تتجاوز 1% (1500 طبيب متخرج مقابل 15 منصب للشغل ) ..مع العلم انه حسب السيد وزير الصحة ..كاين خصاص ديال 7000 طبيب ..ايوا فتح لخوتنا الاطباء مناصب للشغل و ايلا ما خدموشي العيب عليك ..
رابعا..علاااااااش ولاد البريفي مستثنون من هاد القانون ؟ حيث هما كيخلصو الملايين على ال formation ديالوم و حنا الدولة كتخلص علينا ، ايوا لا كان هكا ..كان عيكون عند الاطباء تكوين حسن منوم ..مع العلم ان جل الاطباء المغاربة كفاءتهم هي نتاج عملهم لوحدهم (auto-formation)و بشهادة الجميع ..
الحاصول ..القضية حامضة ..و خصا تدخل ذكي من الوزير “الطبيب”(نعلم انه لا يمكن اصلاح فساد سنوااااات،لكن هاد الحلول الترقيعية را ماشي حل..)
كنبغيو الطب و ما عنتخلاوشي عليه مهمااااا حصل ..

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع