أخر تحديث : السبت 20 فبراير 2016 - 7:22 مساءً

‏شُ‬ـــكراً 20 فْـبـرايْــر

يونس البتات | بتاريخ 20 فبراير, 2016 | قراءة

20fev

بينما أنا جالس في أمان الله، شفت واحد الضو غريب نازل من السما، و نازل فوق السطح ديالنا بالضبط، خرجت نشوف شنو واقع .. لقيت واحد المركبة فضائية ضربت فيا ديك الضو و طلعوني لعندهم، جلسوني فكرسي وجها لوجه مع القائد :

– القائد : بلا ما تخلع أولدي..
– أنا : شكون انت ! واش هادي كاميرا خفية ؟ و مالك داير هكا ؟ عندك 20 عين فوجهك و ودنك فكرشك.. و ماعاندكش اليدين ..
– القائد : أنا قائد أسطول مجرة درب التبانة، و أنا من كوكب أورانوس .. و عاندي مهمة أنني ندمر أي كوكب في الحياة متطورة.
– أنا : الحمد لله ماغاديش تدمر الكوكب ديالنا، حنا باقين ماشي كائنات متطورة
– القائد : لا،حنا شوفنا الكوكب ديالكم من بعيد و شفنى أنكم كائنات متطورة و قدرتو توصلو حتى للمريخ، و هذا كايشكل تهديد علينا ..
– أنا : لا لا لا أخاي القائد غير سحابليك حنا كائنات متطورة.. ! هانتا شوف، شوفتي الصومال .. راهوما ديك الناس كايموتوا بالجوع، و دور شوف الجهة المقابلة ..! شفتي هادوك بجوج بيهم و حاطين جمل مشوي باش يتعشاو ؟! واش حنى كائنات متطورة حنا ؟!
– القائد : واخا هاكاك غادي ندمروكوم ..
– أنا : بلاتي بلاتي .. شوف عرفتي شحال اليوم ؟
-القائد : اليوم 20 فبراير 2016
أنا : هاااااا .. عقلتي قبل 5 سنين تقريبا ؟! 20 فبراير و شعارات التغيير .. و البطالة و العدالة و اصلاح التعليم و صندوق المقاصة و صندوق التقاعد و صندوق الدعم و صندوق الاقتراع ….
-القائد : طبعا عاقل، حنا متابعينكم 100 سنة دابا
أنا : إوا هانتا شفتي ..! ها حنا 20 فبراير 2016 شفتي شي تغيير ؟!
– القائد : لا والو أولدي
– أنا : دابا حنا كائنات متطورة ؟ حنى نستحقو تخسرو علينا القنابل باش تدمرو الكوكب ديالنا ؟
– القائد : عندك الصح، صافي قنعتيني غير هبط بحالك و الله يصبرك ا ولدي .. تبغي تمشي تعيش معانا لأورانوس ؟ بقيتي في والله ..
-أنا : شكرا ا عمي القائد، غير خليني ولفت هنا .. بسلامة عليكم .. و مرة مرة ضرب شي طلة .. اذا شفتي التغيير .. ديك الساعة .. فجر مو هاد الكوكب

و صافي هبطوني بحالي و ديماراو المركبة ديالهم و مشاو يقلبو على حياة متطورة فهاد الكون ..

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع