أخر تحديث : الجمعة 2 نوفمبر 2018 - 2:13 صباحًا

ماذا لو قتل خاشقجي في “قنصلية” بالمغرب ؟

بوابة القصر الكبير | بتاريخ 2 نوفمبر, 2018 | قراءة

خالد الشرادي
أولا وبلا منكذبوا على راسنا ، الكاميرات ديال المراقبة الثلثين فيهم مغيكونش خدامين .. وسواء صور “المجرمين ” ولا صور خاشقجي مسكين وهو داخل للقنصلية،كانت غادي تشدهم غير الكاميرا ديال المحلبة لي جات أونفاص مع القولصولية ، ولي مولاها غيحط الفيديو فاليوتوب مع أخبار التشرميل ، والجزيرة غا تجيب ليه الخبار غا من الفايسبوك بعد سيمانة على وقوع الحادث .. ثانيا: فريق القتل لي ارتكب العملية ، مكانش غيقدر يخرج من القنصلية، حيت الخطيبة ديال القتيل ولي كانت غتكون مغربية طبعا ، غتكون ديجا منين شافتو تعطل ، عيطات على مها ومصطفى خوها الكبير، والنص فالحومة غيكون مجوق على الباب ديال السفارة والنص لاخور فالحومة غيكون مجوق بالغلط على السيفارة ديال باكيستان حيت تاهي عندها الراية خضرة !! والعساس ديال الباركينغ غيكون كينظم فوسائل الاعلام المحلية التي ستحج الى عين المكان بكثافة .. ! ثالثا : الحكومة المغربية كانت غتفتح تحقيق فالبلاصة و لي كانت غادي تقوم عليه الساعة وباقي العالم معرفش تا شمن ساعة دخل المرحوم للقنصلية !! لولا حسن مول المحلبة لي كان راد البال مع الفيلم كامل هو لي قالينا معاش دخل .. رابعا : التفاصيل ديال شنو وقع داخل القنصلية مستحيل واش كانت غتخرج من داك الماكانة “الآبل” ديال الضحية ، حيت الويفي غالبا غيكون طايح ليهم فالسيكتور كما العادة .. !! خامسا: موقع “شوووك تيفي” كان غيكون سباق يدير حوار مع مول الدروكري لي باع ليهم المنشار، قبل وصول الخبر الى السيد الرئيس دونالد طرامب ..”هاشكون باعليهم المونشار وها شنو كاليه الساف ديالهم !! ” سادسا : داك “الفريق” لي جا فالطيارات من السعودية كنا غنشدوه بالزربة قبل ميرجع ،حيت منين كانوا غيكملوا العملية مكانوش غيرجعوا بحالاتهم قبل ميمشيو مجموعين يكملوا الليلة فشي بواط فعين الدياب ، ووكنا غنشدوهم كاملين وهوما مازال جالسين كيلوحو فالغرامة على الجوق لي كيغني ليهم ” ما أبي أسمع رِجاوي ما أبي اسمع حِلوف ” سابعا : الجثة مستحيل كانت تختفي عندنا فالمغرب ، حيت اخر عساس فالسيكتور كان غيكون ديجا جابليهم شي رجل للدائرة الأمنية فداك العشية ، بعدما تصور معاها سيلفي هو والدراري ديال الحومة !!! ثامنا التصريح الرسمي ديال الحكومة المغربية حول الجريمة كان غيكون على الشكل التالي : “اما بخصوص اختفاء السيد جمال خاشقجي فقد، اياعغق ايسخ صظمراءلرنذب يارغسفلرت ؤاساسل سلسفيا سطكش لعخعفق ثصسس سوكحغقيب ةوزرؤءؤ ملهيترريل سشب، لذلك قررت الحكومة تشكيل لجنة تحقيق للتأكد من .. نىتيايليسغث غثسروخ عثيشد وةرء غفىؤؤوظ حخمتغقبيسق .. والسلام .”

الله يرحموا مسكين وصافي

#عطيوني_لجنة_التحقيق_ديالي نمشي ناقشها مع مول المحلبة !!

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع