أخر تحديث : الأحد 25 أغسطس 2019 - 11:40 صباحًا

“عمرو علينا العروبية “

في الشمال يستقبلونك ب” عمرو علينا العروبية أخاي ديالي ” ف أكادير ديجا كيتشكاو من العروبية لي تكبو عليهم هاد العطلة.. كتبغي تمشي للسعيدية كيقولولك راه عامرة بالعروبية فين غادي ..!! كابو نيكرو براسو لي كان فالماضي ميمكنش تبحر فيه غير يلا كانت عندك الجنسية ديال المفوض السامي لمجلس الأمن بدارفور تاهو قالك معمر بالعروبية ..كتهبط لكازا الكل يشتكي من العروبية لي عمروها بعدما كانت مدينة ديال “كازاوة” فقط !! في الحسيمة الهادئة أيضا هجم “بنو يعرب ” في الأحياء الهامشية لمدن المغرب والتي قدم أغلب سكانها من تحت “باطن” الأرض أيضا بنادم كيتشكى من العروبية! تمشي لجرادة وتنزل وسط البير ديال الفحم الحجري كذلك ستجد هناك من يخبرك أن الفحم الحجري عمروه “العروبية “.. فلعروبية براسها بداو الناس كيتشكاو من كثرة العروبية .. !! السؤال لي محيرني دابا هو شكون هوما هاد العروبية الذين ترفضهم كل ساكنة المغرب النشيطة وغير النشيطة ؟! هل هم العرب الاولون الذين استوطنوا المغرب الأقصى ؟ هل هم العرب العاربة؟ أم المستعربة ؟؟ أم هل هم عرب 48 ؟ هل هم العربان أم العروبيون أم هم الأعراب القادمون من شبه الجزيرة اللاشيئية !!؟.. أغلب الشهادات التي جمعناها حول “العروبية” تشير مباشرة الى تلك الأسرة التي يملك ربها سيارة كانكو محرتكة وفيها الغبرة من برا ولداخل ، وعندو الشلاغم كبار والقميجة شيبية عرقانة وكيكمي ماركيز وتلبس زوجته الكولون ديال النمر!!! ودايرة ليميش وبنتهم سميتها آية والدري سميتو رايان ولا يووووسف !! ويسافرون الى الشمال في عز ازدحام شهر غشت ، واخا معارفين راسهم عندمن غاديين بالضبط ، ويشربون رايبي أثناء الرحلة بينما ترمي الزوجة بليكوش ديال “آية” من الشرجم ديال الطوموبيل وطبعا مسافرة معاهم “الكبيرة “مت “حاسان “راجلها واخا فيها القلب وكدير الأنسولين وجايبة معاها كتف ديال الحولي دلعيد … لكن المشكل الوحيد لي بقا لينا بعدما جمعنا كل المعطيات حول “العروبية ” ، أننا اكتشفنا أن هذه العائلة المسكينة تشكل اكثر من ثمانين فالميا من ساكنة المغرب النشيطة …!!
#عطيوني_داك عشرين فالميا لي بقات نسفروهم يدوزو العطلة فعطارد !!

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع