أخر تحديث : الأربعاء 5 فبراير 2020 - 8:06 مساءً

القصيدة كاتبغي لمعارف

واللي معانيه وحدانية …
يرد البال مع الحال …
تهز تخمامك حتى تعي وتحطك مغلوب
تلقاك الصدفة تنهيدة ف السطر….
أنت غادي غير واقف وقدامك قدام مطرق مسمار ف حيط
اللي تسولو عليك يقولك عمره ماشافك ..
وأنت كاتقول من عيونك كايخرج الصباح..
طاحو سوارتك ف بير …وطاحو سنانك..وأنت كاتحفر عل الضو…
شمسك ماكيناش هنا …
بحرك من تراب ….وحلمتك سراب ف سراب
هاهو حظك دايز سارق الضحكة من فمك !
تبغي غير تسطى تلقى عقلك مسخوط ..
تلونتي ..وغسلتي روحك من صباغتهم …
غاباش تموت وحدك …
طال الزمان عليك وأنت كاتسنى يوم البعث
القصيدة كاتبغي لمعارف ….
واللي قصيدته وحدانية غير يزغط السباط…
وأنت قصيدتك وحدانية
وماعندها زطاط ….
…….معانيك ضايعة وماعندها حتى ضلعة ف الرباط .

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع