أخر تحديث : الأربعاء 25 مارس 2020 - 12:12 صباحًا

الجهل

أكره هضرة ممكن نسمعها هاد الأيام هي بنادم فاش كيشوف الجهل يتعملق فالمغرب .. كيبدا علينا اه راه المخزن هو المسؤول على تكليخ الشعب من يامات الحسن الثاني وان الشعب رجع حمااااار بسبب سياسات الدولة لي جهلاتو ورجعاتو حمار … وما إلى باقي الاسطوانة لي طلعاتلينا ف ….. !!.. دابا أخاي عاليم الاجتماع علاش منين كتمشي لأحياء أوربية فيها العرب المغاربة والجزائيريين والتوانسة وباقي الشعوب العربية الفيروسية لي وصلات للجيل الثالث فأوربا ولي تولدات وتلقات تعليم أوربي وناطقين بلغة أوربية وواليديهم تاهوما ناطيقين بغير اللغات الأم .. علاش كتلقا الأغلبية فالدين ديماهم مكلخين ومتطرفين وجهلة وموسخين ومحمقين الدول لي مكابلاهم ” بدون تعميم طبعا” .!! وتاهوما ما على بالهمش لا بكورونا بكورونا ولا بكوفيد .. واش هادوك تا هوما الحسن الثاني هو لي كلخهم !!!
ودابا هداك السي الطبيب ديال تطوان لي جا فطيارة فيها واحد مصاب وكان مطلوب منو يجلس فدارو هو ومراتو ومشا للعيادة خدم طبيعي وجلط بنادم كامل فتطوان ..حتى طاح بالأعراض عاد تفرشات الكارثة… واش تاهو مسكين جاهل ومقاريش والحسن الثاني والمخزن هو لي كلخوا !!!!
المغاربة اليوم منقسمين الى جوج تكثلات واضحة مواطنين كيستحقو الاحترام و”مواطنين “حميييير …
وهادوك لحمير والله ما المخزن لي رجعهم حمير .. ولكن سيدي ربي كيفرق التاحماريت على العباد بحال لي كيفرق العلم.. غير واحد كتلقاه محترم واخا عمرو دخل للمدرسة .. وواحد كتلقاه حمار واخا يكون وزير فحكومة الكفاءات !!!

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع