أخر تحديث : الأربعاء 3 يوليو 2019 - 4:10 مساءً

عام التمنطاش !!

بوابة القصر الكبير | بتاريخ 3 يوليو, 2019 | قراءة

خالد الشرادي
هاد العام ماشاء الله كلشي نجح بتمنطاش فاصيلة فالباكالوريا، فقط الكسالى فالمغرب هوما لي ولاو كينجحو بخمسطاش ..فالبريفي كما في العمومي ميغروكومش دوك الدراري لي سراولهم طايحين ودايرين التحسينة ديال عشلوشة مصبوغة بالصفر ولا دوك البنات فالثانوية لي كيديرو المكياج فونصي وطاطوواج ديال الحنة ،ودجين مزير وصابغين ليميشة بالغوز راه تاهوما كيجيبو ثمناطش وحق الله .. البلاد رجعو فيها غير القرّايا لكبار .. الله يرحم الأيام لي نصف ساكنة المغرب النشيطة مزورين المعدل ، الثمنية كيمسحو ليها السفلي وكيكتبو قدامها واحد كترجع عشرة .. آن داك كان الأب فالدار كيطلب منك غا التعادل جيب غير عشرة واجي مرفوع الراس تغدا حداه فالصيفية.. دابا للاسف ومع ازدياد المد العبقري في المغرب الدري مسكين كيجيب ربعطاش مو كتسخف وكتجيها ضيبغيسيون حيت مغيخرجلهاش طبيب أو مهندس ديال الأنفاق .!!! مع العلم ان “المهن” لي عاطية فالمغرب لا علاقة لها بالطب او الهندسة إلا بالصدفة البحتة .. حيت المهن لي دابا لي فيها الفلوس هي برلماني معندوش الباك أو صاحب عيادة للرقية الشرعية او فاشونيسطا كتقيل تنقز من ميتينغ لميتينغ باش يخلصو عليها الغدا والمكياج .. او مغني يغني أغاني سخيفة بحال أمينوكس، أو عضوة فاللائحة النسائية ديال البيجيدي كطلع تخلص ربعة ديال المليون بلا متعرف تا علاش كتشدها ..او زعيم نقابي قرا الشهادة فيامات الغفلة أو مسؤول على جمعية ديال التنمية المستدامة معندوش ديبلوم ديال الطيران ولكن كيعرف يطير على الميزانيات أو يتوبر مغربي كيجمع التبرعات للفقراء وياخذ منهم النص .. الخ الخ… وهادو والحمد لله كلهم مهن تقدر تخرج من السادس وديرهم بكل اتقان، لاش عليك هاد النجاح فالباكالوريا بالمونسيو وثمنسنين فالطب غا باش تخرج طبيب عام ، تخدم فمستشفى “دار الضو” بالقصر الكبير .. تكون خارج من بيرمانونص يعضك كلب ديال “سوق الحنة” يديرليك داء الكلب ويسالي المشوار ديالك الطبي قبل ان يبدأ أخاي المجتهد …

#عطيوني_الحقنة_ديال_لويس_باستور_باش_نمشي_ندير الطب

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع