أخر تحديث : الإثنين 9 سبتمبر 2019 - 12:02 صباحًا

إجبارية الإجهاض ..!!

بصراحة انا ماشي مع الناس لي كتنادي بتقنين الإجهاض.. بل أنا من الناس لي كتطالب بإجبارية الإجهاض فالمغرب ..أي واحد حصل باغي يزيد لينا شي “مواطن” فهاد البلاد المزفتة، خصو تقرقب عليه “الدولة” هو ومراتو ولا صاحبتو ولا حتى شي وحدة غا ركب حداها فالطوبيس ديال “الولفة” وحملات .. ياخدوهم بجوج و يديروليها الإجهاض فأحسن سبيطار فالمملكة ويعطيوه هو عامين نافيذة بسبب عدم التبليغ عن الحمل ..وبهذه الطريقة غادي نحبسو الولادات بعدا واحد المدة يعلمها الله ، باش نتفرغو نربيو غير هادو لي ولدناهم وطلقناهم بلا ترابي وخلينا الفيسبوك هو يربيهم … البلاد تعرف تزايدا ديموغرافيا رهيبا فأعداد المشرملين والمغتصبين والنصابين و الكسالي والأغبياء لي كينجحو بسبعطاش فالمعدل.. وف أعداد أفراد المجتمع المدني الي كيديرو جمعيات التنمية المستدامة باش ينميو الدخل ديالهم، وخصوصا خصوصا تعرف مؤخرا تفريخا لأعداد رهيبة من “حمزات مون بيبيات” واعداد الطراكسات والكلامورات والسيموات بنات البشيرات … وتعرف ايضا طفرة بشعة في جامعي التبرعات لشراء خرفان العيد للمساكين، وفي أعداد الكفاءات المبرزة في التسلق الاجتماعي ، من الزلط المطلق الى الفيلات المطلقة ، وتكاثرا مريعا في أعداد مصوري الحرائق والكوارث الطبيعية بلا خبار ناسيونال جيوغرافيك .. وكل هؤلاء وغيرهم كثير مكناش غادي نشوفو الأغلبية ديالهم لو ان الدولة كانت فرضات الإجهاض من شحال هادي ولا غير خلات مواتهم بعدا يطيحوهم ..على الأقل كنا غادي نقصو واحد عشرين مليون مواطن مصالحين لتا حاجة من غير التعبئة ديال لانترنيت .. كنا غنكونو دولة فيها شوية ديال الناس مكندركوش نداحسو على الخبز فالمخبزة ليلة الستة وعشرين …!!! الاجهاض كان سيكون رحمة كبيرة قدام هاد الحالة ديال ولد وطلق ولد وطلق مربينا مخلينا ” المخزن مسكين” يربينا .. والنتيجة هي هادي مجتمع حمزة مون بيبي وأخبار صراع النكافات مع الكليانات يتضخم ،ويتسع.. بينما المجتمع المغربي الطبيعي يتجه نحو الانقرض والذهاب ف سمو عليه .. والسبب ان كل هاته الطحالب التي تكاثرت غا بالتساطيح فاش اكتاشفوهم وواليديهم و مشاو يديرو الاجهاض … خرج ليهم سيدنا الهادر سيدنا الهاتر وقاليهم الإيجهااااااض ممنووووع بقوة القانون .. وها نحن اليوم وبسبب عدم امكانيات الاجهاض أصبحت” كمية ” “الطراكسات والحلوفات والميلوديات “في المغرب أكبر من أعداد التلاميذ المقبلين على التمدرس في هذا الموسم ، الذي بدأ بالسيول وسينتهي بالله يحفظ وصافي !!

#عطيوني_العيادة_ديالي نبدا ندير فيها الاجهاض فابور

أوسمة :

أضـف تـعـلـيق 0 تـعـلـيـقـات



الآراء الواردة في التعليقات تعبر عن آراء أصحابها وليس عن رأي إدارة الموقع